Open login
«Қәшқәр» «Әмгәк шатлиғи» билән йәңди
15.04.2019 15:27   

Рашидәм РӘҺМАНОВА,

«Уйғур авази», 10 апрель 2019 ж.

Мәлумки, ахирқи жилларда дөләт программилири бойичә җай-җайларда иҗтимаий әһмийити бар беналар селинип, конилири ремонт қилиниватиду. Шу җүмлидин мәдәнийәт саһасидиму чоң илгириләшләр йүз бериватиду.

 

Мәсилән, Маливай йезисиниң Мәдәнийәт өйи буниңдин бирнәччә жил илгири дөләт программиси асасида ремонтлинип, йеза турғунлири, болупму талантлиқ балилар вә яшлар үчүн тепилмас соға болған еди. Мәдәнийәт өйиниң мудири Валидин Баһамов рәһбәрлигидә һәрхил өмәкләр ечилип, йезидики талантлиқ гөдәкләрниң мүмкинчиликлири кәңәйди. Улар һәрхил көрүк, байқашларға қатнишип, егиз пәллиләрдин көрүнүватиду. Мәсилән, ушбу мәдәнийәт очиғи йенида қурулған “Қәшқәр” миллий саз әсваплири топиниң дуэти йеқинда «Нұрлы жастар» мәркизи тәрипидин уюштурулуп, Алмута шәһиридә өткән «Сырым бар жүрегімде» намлиқ җумһурийәтлик балиларниң иҗадий конкурсида «Әмгәк шатлиғи» сазини орунлап, лауреат аталди.

 

Дуэт әзалири – М.Мақатаев намидики оттура мәктивиниң 7-синип оқуғучилири Амир Һасанов вә Рамиль Ғопуров — Бижанов йезисиниң турғунлири. Улар Маливайға қатнап, саз әсваплирини челишни үгиниватиду.

— Амир билән Рамильниң таланти, тиришчанлиғи вә сәнъәткә болған иштияқи мени қайил қилиду. Шуңлашқиму шагиртлиримни ишәшлик чоң сәһнигә елип чиқтим. Улар мениң үмүтүмни ақлиди. Уларни қоллап келиватқан ата-анилириға рәхмәт ейтқум келиду, – дәйду жигитләрниң устази Валидин Баһамов.

Барлиқ сәнъәтхумар гезитханлиримиз намидин «Қәшқәр» дуэтиниң буниңдин кейинму егиз пәллиләрдин көрүнүшигә тиләкдашлиқ билдүримиз!

Әмгәкчиқазақ наһийәси.

http://uyguravazi.kazgazeta.kz/?p=38804

 

 
Интересный материал? Поделись с другими:

Добавить комментарий


Защитный код
Обновить